ആൾക്കൂട്ടമെന്ന ആയുധം – പി.എഫ്.മാത്യൂസ്

സഹജീവികളോട് ആഭിമുഖ്യമില്ലാത്തത് ഒരു തിന്മയൊന്നുമല്ല. അന്യൻ നരകമെന്ന് എഴുത്തുകാരൻ എഴുതും മുമ്പേ അതുണ്ടായിരുന്നു. (നിലവിലുള്ളവയെ ഒളിവിടങ്ങളിൽനിന്നു കണ്ടെത്തി സൗന്ദര്യത്തോടെ  അവതരിപ്പിക്കുന്നയാളാണ് എഴുത്തുകാരൻ.) അന്യനിൽനിന്ന് ഒഴിഞ്ഞുമാറി തനിയെ  ധ്യാനിക്കുന്ന സര്‍ഗാത്മകതയെ ഞാൻ മാനിക്കുന്നു. അതിനെ ആക്രമിച്ച് ഇല്ലാതാക്കാനാണ് ആൾക്കൂട്ട മനസ്സ് എക്കാലവും ശ്രമിച്ചിട്ടുള്ളത്. സഹജീവിതം അടിച്ചേല്പിക്കുന്നിടത്തെല്ലാം എതിർസ്വരം ഉയർന്നിട്ടുമുണ്ട്. ആ എതിർപ്പുകളില്ലെങ്കിൽ മനുഷ്യകുലത്തിനു ഭാവിയില്ല എന്നാണെന്റെ പക്ഷം.