പത്തു വാചകം മാത്രമുള്ള വീട്
പദ്മദാസ്
എന്റെ വീട് നല്ല ഉറപ്പുള്ളതാണ്. എന്റെ വീട് മഴയെയും വെയിലിനെയും തടയും. എന്റെ വീട്ടിൽ എനിക്കു നിവർന്നു നിൽക്കാനാകും. അച്ഛനമ്മമാർ തെല്ലു കുനിഞ്ഞാണ് വീട്ടിനുള്ളിൽ കഴിയാറുള്ളത്. വീടിനു പുറത്താണ് ഞങ്ങളുടെ കുളിയും നനയും. വീടിനു പുറത്താണ് പാചകം. എന്റെ വീടിനുള്ളിൽ കക്കൂസില്ല. കേടുവന്ന രണ്ടു പഴന്തുണികളാണ് വീടിന്റെ മുൻവാതിലും പിൻവാതിലും. മൂന്നു മീറ്ററാണ് വീടിന്റെ വ്യാസം. ജപ്പാൻ കുടിവെള്ളപദ്ധതി തുടങ്ങിയാൽ വീട് ഞങ്ങളെ വിട്ട്, മിണ്ടാതെ എങ്ങോട്ടോ ഒറ്റയ്ക്ക് യാത്ര പോവുമത്രേ!
പത്തു വാചകങ്ങൾ തികച്ചുമുണ്ട് ‘എന്റെ വീടി’ന്! മററുള്ളവരുടെ വീടിനു കൊടുത്ത മാർക്കിന്റെ പകുതിയെങ്കിലും തരണേ ടീച്ചർ, പാതയോരത്തെ, ഏതു നിമിഷവും വിട്ടു പോരേണ്ട എന്റെ പാവം കൊച്ചുവീടിനും!!
____________________________________
