തൊഴില്‍ നിയമ ഭേദഗതികളും പുതിയ തൊഴില്‍ ജീവിതവും – സി.പി.ജോണ്‍

തൊഴിൽ സമരങ്ങൾ തീർച്ചയായും അനിവാര്യമാണ്. പലപ്പോഴും മധ്യവർഗത്തിന്റെ ചില  തെറ്റുധാരണകളിൽ നിന്നാണ് സമരങ്ങളോടുള്ള പുച്ഛം അവരിൽ ഉടലെടുക്കുന്നത്.  മധ്യവർഗവും ആത്യന്തികമായി  തൊഴിലാളികൾ തന്നെയാണ്.  എങ്കിൽപ്പോലും അസംഘടിത തൊഴിലാളിവർഗത്തിന്റെ സമരങ്ങളോട് പലപ്പോഴും അവർ പുറംതിരിഞ്ഞു നില്കാറാണുള്ളത്. അവർക്കുണ്ടാകുന്ന ചെറിയ ബുദ്ധിമുട്ടുകൾ അവർക്കുകൂടി ഉണ്ടാകുന്ന നല്ല  മാറ്റങ്ങള്‍ക്കു വേണ്ടിയുള്ള  സമരമാണ് എന്ന ബോധ്യത്തിന്റെ കുറവുകൊണ്ടാണ് ഈ തുറന്നെതിർക്കൽ. മധ്യവർഗത്തെ ആശ്രയിക്കുന്ന മാധ്യമങ്ങൾ അത് ഊതിപ്പെരുപ്പിക്കുകയും ചെയ്യും. പക്ഷേ, ഇത്തരത്തിലുള്ള മാധ്യമസൃഷ്ടികളെ മാധ്യമത്തിൽ പ്രവർത്തിക്കുന്ന തൊഴിലാളി(ജേര്‍ണലിസ്റ്റ്)കളെ  എതിർത്തുകൊണ്ടല്ല തൊഴിലാളികൾ നേരിടേണ്ടത്. മാധ്യമപ്രവര്‍ത്തകരെ ആക്രമിക്കുന്ന ഒരു സ്ഥിതിവിശേഷം ഈ അടുത്തകാലത്ത് കേരളത്തിൽ ഉണ്ടായിട്ടുണ്ട്. തികച്ചും അമാനവികവും തൊഴിലാളി വിരുദ്ധവുമാണത്. മാധ്യമപ്രവര്‍ത്തകരും ഒരു സ്ഥാപനത്തിലെ തൊഴിലാളിയാണെന്ന കാര്യം മറക്കരുത്.

എന്തിനാണ് സമരം എന്നത് കൃത്യമായി ജനങ്ങളെ ബോധ്യപ്പെടുത്തണം. ഒപ്പംതന്നെ തൊഴിലാളി നേതാക്കന്മാർ സമരത്തിന്റെ സജീവ പങ്കാളികളാകണം. അവർ സമര ദിനങ്ങളിൽ   കേവലം പ്രസംഗങ്ങളിലേക്ക്  മാത്രം ചുരുങ്ങരുത്. 48 മണിക്കൂർ അഖിലേന്ത്യാ പണിമുടക്ക് ഈയിടെ പ്രഖ്യാപിച്ചു. പക്ഷേ, ഇന്ത്യയുടെ 1000 കേന്ദ്രങ്ങളിൽ തൊഴിലാളി നേതാക്കന്മാർ 48 മണിക്കൂർ നിരാഹാരം കിടന്നിരുന്നെങ്കിൽ അത് വലിയൊരു ചലനം സൃഷ്ടിക്കുമായിരുന്നു. തൊഴിലാളിനേതൃത്വവും തൊഴിലാളികളും തമ്മിലുള്ള അന്തരങ്ങൾ പെരുപ്പിച്ചു കാണിക്കുവാനുള്ള ശ്രമങ്ങൾ പല മാധ്യമങ്ങളും നടത്തുന്നുണ്ടെന്നതും യാഥാർത്ഥ്യമാണ്. നേതാക്കന്മാര്‍ 48 മണിക്കൂർ പണിമുടക്കിൽ നിരാഹാരം പോലുള്ള സമരപരിപാടികളിൽ പങ്കെടുക്കുകയോ അതിലധികം നീണ്ടുനില്ക്കുന്ന ത്യാഗം സഹിച്ചുള്ള സമരങ്ങളിലൂടെ തൊഴിലാളികളുമായി കൂടുതല്‍ അടുക്കുകയോ വേണമായിരുന്നു. എ.കെ.ജി. കാണിച്ച മാതൃക അതായിരുന്നു.

അതിനുപകരം ട്രേഡ് യൂണിയൻ ബോസിസം ഉണ്ടാകുന്നുണ്ടോ എന്നത് ചിന്തിക്കേണ്ട കാര്യമാണ്. തൊഴിലാളി നേതാക്കന്മാരുടെ ഭാഷ വളരെ പ്രധാനമാണ്. രണ്ടുമാസം മുമ്പ് പറഞ്ഞിട്ടല്ലേ പണിമുടക്ക് നടത്തിയത് പിന്നെ എന്തിനാണ് നിങ്ങൾ പുറത്തിറങ്ങിയത് എന്ന് തലേദിവസം കുഞ്ഞിന്  ശ്വാസംമുട്ടൽ വന്ന് മരുന്നു വാങ്ങാൻ പുറത്തിറങ്ങിയ അമ്മയോട് ചോദിക്കുകന്നത് ശരിയല്ല. രണ്ട് മാസം മുമ്പ് പണിമുടക്ക് പ്രഖ്യാപിച്ചത് അവർ അറിയാഞ്ഞിട്ടല്ല. മനുഷ്യർക്ക് ഇതുപോലെ അവരുടേതായ ദൈനംദിനപ്രശ്‌നങ്ങൾ ധാരാളമുണ്ട്. അപൂർവം ചില കുത്തകമുതലാളിമാർ ഒഴികെ എല്ലാവരും ഈ സമരത്തിന്റെ ഭാഗമാകേണ്ടവരാണെന്നും അവർ സമരത്തിന് പലപ്പോഴും പുറത്തിറങ്ങുന്നത് അവരുടെ നിവൃത്തികേടുകൊണ്ടാണ് എന്നും മനസ്സിലാക്കിക്കൊണ്ട് വളരെ അനുകമ്പയോടെ അവരെക്കൂടി സമരത്തിൽ ഉൾപ്പെടുത്തേണ്ട ശ്രമമാണ് വേണ്ടത്. മറിച്ച് ഒരു ഓട്ടോറിക്ഷയുമായി ഇറങ്ങിയ ആളെ അടിക്കുകയും കുത്തുകയും ചെയ്യുന്നത് തൊഴിലാളി വിരുദ്ധമായ  രീതിയാണ്. ആ തൊഴിലാളിയെ അടുത്ത തൊഴിലാളി സമരത്തിന്റെ പതാക പിടിക്കുന്ന ഒരു തൊഴിലാളി സംഘടനാ പ്രവർത്തകനായി മാറ്റുക എന്നതാണ് യഥാർത്ഥ ട്രേഡ് യൂണിയൻ പ്രവര്‍ത്തനം. പ്രത്യേകിച്ചും പുരോഗമന ട്രേഡ് യൂണിയൻ പ്രവര്‍ത്തനം.

പൊതുമേഖലയെ തളർത്തുന്ന അമിതമായ ട്രേഡ് യൂണിയനിസം