സ്വാതന്ത്ര്യത്തിൻ്റെ രുചി സ്വന്തം ചോരയുടെ ഉപ്പാണല്ലോ

……therefore I am pleased to detain you……. – കക്കയം കോൺസൻട്രേഷൻ ക്യാമ്പിൽ നിന്ന് കണ്ണുകെട്ടി ഇറക്കി കൊണ്ടുവന്ന് കണ്ണൂർ സെൻട്രൽ ജയിലിൻ്റെ മുമ്പിൽ നിർത്തി ഇങ്ങനെ തുടങ്ങുന്ന ജില്ലാ കലക്റ്ററുടെ ഉത്തരവിൻ്റെ കോപ്പി കൈപ്പറ്റിയതോടെ ഞങ്ങൾ എഴുപതുകളിലെ ക്ഷുബ്ധ യൗവനത്തിൻ്റെ പ്രതിനിധികളായ ആ പതിനെട്ടു പേരുടെയും തലയിലെഴുത്ത് മാറുകയായിരുന്നു. അന്ന് അർബൻ നക്സലൈറ്റ് എന്ന പേരില്ലായിരുന്നു എന്ന് മാത്രം .പിന്നീട് അടുത്ത ഒന്നൊന്നര കൊല്ലം ഞാൻ വെറുമൊരു നമ്പറായി – D384 .മുന്നൂറ്റി എൺപത്തിനാലാം നമ്പർ മിസാ തടവുകാരൻ . ഇന്നത്തെ യുഎപിഎ യുടെ മുൻഗാമിയായിരുന്നു അടിയന്തിരാവസ്ഥക്കാലത്തെ മിസ (maintenance of internal security act). രണ്ട് കരിനിയമങ്ങൾക്കുമിടയിൽ പോട്ടയും ടാഡയും വന്നു . ഇപ്പോഴും കരുതൽ തടങ്കൽ നിയമമനുസരിച്ച് ആയിരക്കണക്കിന് തടവുകാർ കേരളത്തിലടക്കം ജയിലുകളിൽ . സാധാരണ തടവുകാർ കുറ്റവാളിയെന്ന് പ്രോസിക്യൂഷൻ കോടതിയിൽ സർവമാന തെളിവുകളും ഹാജരാക്കി സ്ഥാപിച്ച് ശിക്ഷിക്കുന്നതു വരെ നിരപരാധികൾ ,വിചാരണ കാത്തു കഴിയുന്നവർ. കരുതൽതടങ്കൽ തടവുകാരാവട്ടെ സ്വയം തെളിയിക്കണം നിരപരാധിയാണ് എന്ന് . അതുവരെ കുറ്റവാളികൾ, അതും കൊടും കുറ്റവാളികളായ രാജ്യദ്രോഹികൾ തന്നെ . നോക്കു , നിയമത്തിലെ പ്രാഥമിക നീതി തന്നെ അട്ടിമറിക്കപ്പെടുന്നത് ….